VULC ¹ [Ephraim pascit ventum,
et sequitur æstum ;
tota die mendacium et vastitatem multiplicat :
et fœdus cum Assyriis iniit,
et oleum in Ægyptum ferebat.

VULC ² Judicium ergo Domini cum Juda,
et visitatio super Jacob :
juxta vias ejus, et juxta adinventiones ejus reddet ei.

VULC ³ In utero supplantavit fratrem suum,
et in fortitudine sua directus est cum angelo.

VULC ⁴ Et invaluit ad angelum, et confortatus est ;
flevit, et rogavit eum.
In Bethel invenit eum,
et ibi locutus est nobiscum.

VULC ⁵ Et Dominus Deus exercituum,
Dominus memoriale ejus.

VULC ⁶ Et tu ad Deum tuum converteris ;
misericordiam et judicium custodi,
et spera in Deo tuo semper.

VULC ⁷ Chanaan, in manu ejus statera dolosa,
calumniam dilexit.

VULC ⁸ Et dixit Ephraim : Verumtamen dives effectus sum ;
inveni idolum mihi :
omnes labores mei non invenient mihi iniquitatem quam peccavi.

VULC ⁹ Et ego Dominus Deus tuus ex terra Ægypti :
adhuc sedere te faciam in tabernaculis, sicut in diebus festivitatis.

VULC ¹⁰ Et locutus sum super prophetas,
et ego visionem multiplicavi,
et in manu prophetarum assimilatus sum.

VULC ¹¹ Si Galaad idolum, ergo frustra erant in Galgal bobus immolantes ;
nam et altaria eorum quasi acervi super sulcos agri.

VULC ¹² Fugit Jacob in regionem Syriæ,
et servivit Israël in uxorem,
et in uxorem servavit.

VULC ¹³ In propheta autem eduxit Dominus Israël de Ægypto,
et in propheta servatus est.

VULC ¹⁴ Ad iracundiam me provocavit Ephraim in amaritudinibus suis :
et sanguis ejus super eum veniet,
et opprobrium ejus restituet ei Dominus suus.]