VULC ¹ Hæc sunt judicia quæ propones eis.

VULC ² Si emeris servum hebræum, sex annis serviet tibi : in septimo egredietur liber gratis.

VULC ³ Cum quali veste intraverit, cum tali exeat : si habens uxorem, et uxor egredietur simul.

VULC ⁴ Sin autem dominus dederit illi uxorem, et pepererit filios et filias : mulier et liberi ejus erunt domini sui, ipse vero exibit cum vestitu suo.

VULC ⁵ Quod si dixerit servus : Diligo dominum meum et uxorem ac liberos ; non egrediar liber :

VULC ⁶ offeret eum dominus diis, et applicabitur ad ostium et postes, perforabitque aurem ejus subula : et erit ei servus in sæculum.

VULC ⁷ Si quis vendiderit filiam suam in famulam, non egredietur sicut ancillæ exire consueverunt.

VULC ⁸ Si displicuerit oculis domini sui cui tradita fuerat, dimittet eam : populo autem alieno vendendi non habebit potestatem, si spreverit eam.

VULC ⁹ Sin autem filio suo desponderit eam, juxta morem filiarum faciet illi.

VULC ¹⁰ Quod si alteram ei acceperit, providebit puellæ nuptias, et vestimenta, et pretium pudicitiæ non negabit.

VULC ¹¹ Si tria ista non fecerit, egredietur gratis absque pecunia.

VULC ¹² Qui percusserit hominem volens occidere, morte moriatur.

VULC ¹³ Qui autem non est insidiatus, sed Deus illum tradidit in manus ejus, constituam tibi locum in quem fugere debeat.

VULC ¹⁴ Si quis per industriam occiderit proximum suum, et per insidias : ab altari meo evelles eum, ut moriatur.

VULC ¹⁵ Qui percusserit patrem suum aut matrem, morte moriatur.

VULC ¹⁶ Qui furatus fuerit hominem, et vendiderit eum, convictus noxæ, morte moriatur.

VULC ¹⁷ Qui maledixerit patri suo, vel matri, morte moriatur.

VULC ¹⁸ Si rixati fuerint viri, et percusserit alter proximum suum lapide vel pugno, et ille mortuus non fuerit, sed jacuerit in lectulo :

VULC ¹⁹ si surrexerit, et ambulaverit foris super baculum suum, innocens erit qui percusserit, ita tamen ut operas ejus et impensas in medicos restituat.

VULC ²⁰ Qui percusserit servum suum, vel ancillam virga, et mortui fuerint in manibus ejus, criminis reus erit.

VULC ²¹ Sin autem uno die vel duobus supervixerit, non subjacebit pœnæ, quia pecunia illius est.

VULC ²² Si rixati fuerint viri, et percusserit quis mulierem prægnantem, et abortivum quidem fecerit, sed ipsa vixerit : subjacebit damno quantum maritus mulieris expetierit, et arbitri judicaverint.

VULC ²³ Sin autem mors ejus fuerit subsecuta, reddet animam pro anima,

VULC ²⁴ oculum pro oculo, dentem pro dente, manum pro manu, pedem pro pede,

VULC ²⁵ adustionem pro adustione, vulnus pro vulnere, livorem pro livore.

VULC ²⁶ Si percusserit quispiam oculum servi sui aut ancillæ, et luscos eos fecerit, dimittet eos liberos pro oculo quem eruit.

VULC ²⁷ Dentem quoque si excusserit servo vel ancillæ suæ, similiter dimittet eos liberos.

VULC ²⁸ Si bos cornu percusserit virum aut mulierem, et mortui fuerint, lapidibus obruetur : et non comedentur carnes ejus, dominus quoque bovis innocens erit.

VULC ²⁹ Quod si bos cornupeta fuerit ab heri et nudiustertius, et contestati sunt dominum ejus, nec recluserit eum, occideritque virum aut mulierem : et bos lapidibus obruetur, et dominum ejus occident.

VULC ³⁰ Quod si pretium fuerit ei impositum, dabit pro anima sua quidquid fuerit postulatus.

VULC ³¹ Filium quoque et filiam si cornu percusserit, simili sententiæ subjacebit.

VULC ³² Si servum ancillamque invaserit, triginta siclos argenti domino dabit, bos vero lapidibus opprimetur.

VULC ³³ Si quis aperuerit cisternam, et foderit, et non operuerit eam, cecideritque bos aut asinus in eam,

VULC ³⁴ reddet dominus cisternæ pretium jumentorum : quod autem mortuum est, ipsius erit.

VULC ³⁵ Si bos alienus bovem alterius vulneraverit, et ille mortuus fuerit : vendent bovem vivum, et divident pretium, cadaver autem mortui inter se dispertient.

VULC ³⁶ Sin autem sciebat quod bos cornupeta esset ab heri et nudiustertius, et non custodivit eum dominus suus : reddet bovem pro bove, et cadaver integrum accipiet.