VULC ¹ Facies quoque altare ad adolendum thymiama, de lignis setim,

VULC ² habens cubitum longitudinis, et alterum latitudinis, id est, quadrangulum, et duos cubitos in altitudine. Cornua ex ipso procedent.

VULC ³ Vestiesque illud auro purissimo, tam craticulam ejus, quam parietes per circuitum, et cornua. Faciesque ei coronam aureolam per gyrum,

VULC ⁴ et duos annulos aureos sub corona per singula latera, ut mittantur in eos vectes, et altare portetur.

VULC ⁵ Ipsos quoque vectes facies de lignis setim, et inaurabis.

VULC ⁶ Ponesque altare contra velum, quod ante arcam pendet testimonii coram propitiatorio quo tegitur testimonium, ubi loquar tibi.

VULC ⁷ Et adolebit incensum super eo Aaron, suave fragrans, mane. Quando componet lucernas, incendet illud :

VULC ⁸ et quando collocabit eas ad vesperum, uret thymiama sempiternum coram Domino in generationes vestras.

VULC ⁹ Non offeretis super eo thymiama compositionis alterius, nec oblationem, et victimam, nec libabitis libamina.

VULC ¹⁰ Et deprecabitur Aaron super cornua ejus semel per annum, in sanguine quod oblatum est pro peccato, et placabit super eo in generationibus vestris. Sanctum sanctorum erit Domino.

VULC ¹¹ Locutusque est Dominus ad Moysen, dicens :

VULC ¹² Quando tuleris summam filiorum Israël juxta numerum, dabunt singuli pretium pro animabus suis Domino, et non erit plaga in eis, cum fuerint recensiti.

VULC ¹³ Hoc autem dabit omnis qui transit ad nomen, dimidium sicli juxta mensuram templi (siclus viginti obolos habet) ; media pars sicli offeretur Domino.

VULC ¹⁴ Qui habetur in numero, a viginti annis et supra, dabit pretium.

VULC ¹⁵ Dives non addet ad medium sicli, et pauper nihil minuet.

VULC ¹⁶ Susceptamque pecuniam, quæ collata est a filiis Israël, trades in usus tabernaculi testimonii, ut sit monimentum eorum coram Domino, et propitietur animabus eorum.

VULC ¹⁷ Locutusque est Dominus ad Moysen, dicens :

VULC ¹⁸ Facies et labrum æneum cum basi sua ad lavandum : ponesque illud inter tabernaculum testimonii et altare. Et missa aqua,

VULC ¹⁹ lavabunt in ea Aaron et filii ejus manus suas ac pedes,

VULC ²⁰ quando ingressuri sunt tabernaculum testimonii, et quando accessuri sunt ad altare, ut offerant in eo thymiama Domino,

VULC ²¹ ne forte moriantur ; legitimum sempiternum erit ipsi, et semini ejus per successiones.

VULC ²² Locutusque est Dominus ad Moysen,

VULC ²³ dicens : Sume tibi aromata, primæ myrrhæ et electæ quingentos siclos, et cinnamomi medium, id est, ducentos quinquaginta siclos, calami similiter ducentos quinquaginta,

VULC ²⁴ casiæ autem quingentos siclos, in pondere sanctuarii, olei de olivetis mensuram hin :

VULC ²⁵ faciesque unctionis oleum sanctum, unguentum compositum opere unguentarii,

VULC ²⁶ et unges ex eo tabernaculum testimonii, et arcam testamenti,

VULC ²⁷ mensamque cum vasis suis, et candelabrum, et utensilia ejus, altaria thymiamatis,

VULC ²⁸ et holocausti, et universam supellectilem quæ ad cultum eorum pertinet.

VULC ²⁹ Sanctificabisque omnia, et erunt Sancta sanctorum ; qui tetigerit ea, sanctificabitur.

VULC ³⁰ Aaron et filios ejus unges, sanctificabisque eos, ut sacerdotio fungantur mihi.

VULC ³¹ Filiis quoque Israël dices : Hoc oleum unctionis sanctum erit mihi in generationes vestras.

VULC ³² Caro hominis non ungetur ex eo, et juxta compositionem ejus non facietis aliud, quia sanctificatum est, et sanctum erit vobis.

VULC ³³ Homo quicumque tale composuerit, et dederit ex eo alieno, exterminabitur de populo suo.

VULC ³⁴ Dixitque Dominus ad Moysen : Sume tibi aromata, stacten et onycha, galbanum boni odoris, et thus lucidissimum ; æqualis ponderis erunt omnia :

VULC ³⁵ faciesque thymiama compositum opere unguentarii, mistum diligenter, et purum, et sanctificatione dignissimum.

VULC ³⁶ Cumque in tenuissimum pulverem universa contuderis, pones ex eo coram tabernaculo testimonii, in quo loco apparebo tibi. Sanctum sanctorum erit vobis thymiama.

VULC ³⁷ Talem compositionem non facietis in usus vestros, quia sanctum est Domino.

VULC ³⁸ Homo quicumque fecerit simile, ut odore illius perfruatur, peribit de populis suis.