VULC ¹ Fecit ergo Beseleel, et Ooliab, et omnis vir sapiens, quibus dedit Dominus sapientiam et intellectum, ut scirent fabre operari quæ in usus sanctuarii necessaria sunt, et quæ præcepit Dominus.

VULC ² Cumque vocasset eos Moyses et omnem eruditum virum, cui dederat Dominus sapientiam, et qui sponte sua obtulerant se ad faciendum opus,

VULC ³ tradidit eis universa donaria filiorum Israël. Qui cum instarent operi, quotidie mane vota populus offerebat.

VULC ⁴ Unde artifices venire compulsi,

VULC ⁵ dixerunt Moysi : Plus offert populus quam necessarium est.

VULC ⁶ Jussit ergo Moyses præconis voce cantari : Nec vir, nec mulier quidquam offerat ultra in opere sanctuarii. Sicque cessatum est a muneribus offerendis,

VULC ⁷ eo quod oblata sufficerent et superabundarent.

VULC ⁸ Feceruntque omnes corde sapientes ad explendum opus tabernaculi, cortinas decem de bysso retorta, et hyacintho, et purpura, coccoque bis tincto, opere vario, et arte polymita :

VULC ⁹ quarum una habebat in longitudine viginti octo cubitos, et in latitudine quatuor ; una mensura erat omnium cortinarum.

VULC ¹⁰ Conjunxitque cortinas quinque, alteram alteri, et alias quinque sibi invicem copulavit.

VULC ¹¹ Fecit et ansas hyacinthinas in ora cortinæ unius ex utroque latere, et in ora cortinæ alterius similiter,

VULC ¹² ut contra se invicem venirent ansæ, et mutuo jungerentur.

VULC ¹³ Unde et quinquaginta fudit circulos aureos, qui morderent cortinarum ansas, et fieret unum tabernaculum.

VULC ¹⁴ Fecit et saga undecim de pilis caprarum ad operiendum tectum tabernaculi :

VULC ¹⁵ unum sagum in longitudine habebat cubitos triginta, et in latitudine cubitos quatuor : unius mensuræ erant omnia saga :

VULC ¹⁶ quorum quinque junxit seorsum, et sex alia separatim.

VULC ¹⁷ Fecitque ansas quinquaginta in ora sagi unius, et quinquaginta in ora sagi alterius, ut sibi invicem jungerentur.

VULC ¹⁸ Et fibulas æneas quinquaginta, quibus necteretur tectum, ut unum pallium ex omnibus sagis fieret.

VULC ¹⁹ Fecit et opertorium tabernaculi de pellibus arietum rubricatis : aliudque desuper velamentum de pellibus janthinis.

VULC ²⁰ Fecit et tabulas tabernaculi de lignis setim stantes.

VULC ²¹ Decem cubitorum erat longitudo tabulæ unius : et unum ac semis cubitum latitudo retinebat.

VULC ²² Binæ incastraturæ erant per singulas tabulas, ut altera alteri jungeretur. Sic fecit in omnibus tabernaculi tabulis.

VULC ²³ E quibus viginti ad plagam meridianam erant contra austrum,

VULC ²⁴ cum quadraginta basibus argenteis. Duæ bases sub una tabula ponebantur ex utraque parte angulorum, ubi incastraturæ laterum in angulis terminantur.

VULC ²⁵ Ad plagam quoque tabernaculi, quæ respicit ad aquilonem, fecit viginti tabulas,

VULC ²⁶ cum quadraginta basibus argenteis, duas bases per singulas tabulas.

VULC ²⁷ Contra occidentem vero, id est, ad eam partem tabernaculi quæ mare respicit, fecit sex tabulas,

VULC ²⁸ et duas alias per singulos angulos tabernaculi retro :

VULC ²⁹ quæ junctæ erant a deorsum usque sursum, et in unam compaginem pariter ferebantur. Ita fecit ex utraque parte per angulos :

VULC ³⁰ ut octo essent simul tabulæ, et haberent bases argenteas sedecim, binas scilicet bases sub singulis tabulis.

VULC ³¹ Fecit et vectes de lignis setim, quinque ad continendas tabulas unius lateris tabernaculi,

VULC ³² et quinque alios ad alterius lateris coaptandas tabulas : et extra hos, quinque alios vectes ad occidentalem plagam tabernaculi contra mare.

VULC ³³ Fecit quoque vectem alium, qui per medias tabulas ab angulo usque ad angulum perveniret.

VULC ³⁴ Ipsa autem tabulata deauravit, fusis basibus earum argenteis. Et circulos eorum fecit aureos, per quos vectes induci possent : quos et ipsos laminis aureis operuit.

VULC ³⁵ Fecit et velum de hyacintho, et purpura, vermiculo, ac bysso retorta, opere polymitario, varium atque distinctum :

VULC ³⁶ et quatuor columnas de lignis setim, quas cum capitibus deauravit, fusis basibus earum argenteis.

VULC ³⁷ Fecit et tentorium in introitu tabernaculi ex hyacintho, purpura, vermiculo, byssoque retorta, opere plumarii :

VULC ³⁸ et columnas quinque cum capitibus suis, quas operuit auro, basesque earum fudit æneas.