VULC ¹ Dixit quoque Dominus ad Moysen et Aaron in terra Ægypti :

VULC ² Mensis iste, vobis principium mensium : primus erit in mensibus anni.

VULC ³ Loquimini ad universum cœtum filiorum Israël, et dicite eis : Decima die mensis hujus tollat unusquisque agnum per familias et domos suas.

VULC ⁴ Sin autem minor est numerus ut sufficere possit ad vescendum agnum, assumet vicinum suum qui junctus est domui suæ, juxta numerum animarum quæ sufficere possunt ad esum agni.

VULC ⁵ Erit autem agnus absque macula, masculus, anniculus : juxta quem ritum tolletis et hædum.

VULC ⁶ Et servabitis eum usque ad quartamdecimam diem mensis hujus : immolabitque eum universa multitudo filiorum Israël ad vesperam.

VULC ⁷ Et sument de sanguine ejus, ac ponent super utrumque postem, et in superliminaribus domorum, in quibus comedent illum.

VULC ⁸ Et edent carnes nocte illa assas igni, et azymos panes cum lactucis agrestibus.

VULC ⁹ Non comedetis ex eo crudum quid, nec coctum aqua, sed tantum assum igni : caput cum pedibus ejus et intestinis vorabitis.

VULC ¹⁰ Nec remanebit quidquam ex eo usque mane ; si quid residuum fuerit, igne comburetis.

VULC ¹¹ Sic autem comedetis illum : renes vestros accingetis, et calceamenta habebitis in pedibus, tenentes baculos in manibus, et comedetis festinanter : est enim Phase (id est, transitus) Domini.

VULC ¹² Et transibo per terram Ægypti nocte illa, percutiamque omne primogenitum in terra Ægypti ab homine usque ad pecus : et in cunctis diis Ægypti faciam judicia. Ego Dominus.

VULC ¹³ Erit autem sanguis vobis in signum in ædibus in quibus eritis : et videbo sanguinem, et transibo vos : nec erit in vobis plaga disperdens quando percussero terram Ægypti.

VULC ¹⁴ Habebitis autem hunc diem in monumentum : et celebrabitis eam solemnem Domino in generationibus vestris cultu sempiterno.

VULC ¹⁵ Septem diebus azyma comedetis : in die primo non erit fermentum in domibus vestris : quicumque comederit fermentatum, peribit anima illa de Israël, a primo die usque ad diem septimum.

VULC ¹⁶ Dies prima erit sancta atque solemnis, et dies septima eadem festivitate venerabilis : nihil operis facietis in eis, exceptis his, quæ ad vescendum pertinent.

VULC ¹⁷ Et observabitis azyma : in eadem enim ipsa die educam exercitum vestrum de terra Ægypti, et custodietis diem istum in generationes vestras ritu perpetuo.

VULC ¹⁸ Primo mense, quartadecima die mensis ad vesperam, comedetis azyma usque ad diem vigesimam primam ejusdem mensis ad vesperam.

VULC ¹⁹ Septem diebus fermentum non invenietur in domibus vestris : qui comederit fermentatum, peribit anima ejus de cœtu Israël, tam de advenis quam de indigenis terræ.

VULC ²⁰ Omne fermentatum non comedetis : in cunctis habitaculis vestris edetis azyma.

VULC ²¹ Vocavit autem Moyses omnes seniores filiorum Israël, et dixit ad eos : Ite tollentes animal per familias vestras, et immolate Phase.

VULC ²² Fasciculumque hyssopi tingite in sanguine qui est in limine, et aspergite ex eo superliminare, et utrumque postem : nullus vestrum egrediatur ostium domus suæ usque mane.

VULC ²³ Transibit enim Dominus percutiens Ægyptios : cumque viderit sanguinem in superliminari, et in utroque poste, transcendet ostium domus, et non sinet percussorem ingredi domos vestras et lædere.

VULC ²⁴ Custodi verbum istud legitimum tibi et filiis tuis usque in æternum.

VULC ²⁵ Cumque introieritis terram, quam Dominus daturus est vobis ut pollicitus est, observabitis cæremonias istas.

VULC ²⁶ Et cum dixerint vobis filii vestri : Quæ est ista religio ?

VULC ²⁷ Dicetis eis : Victima transitus Domini est, quando transivit super domos filiorum Israël in Ægypto, percutiens Ægyptios, et domos nostras liberans. Incurvatusque populus adoravit.

VULC ²⁸ Et egressi filii Israël fecerunt sicut præceperat Dominus Moysi et Aaron.

VULC ²⁹ Factum est autem in noctis medio, percussit Dominus omne primogenitum in terra Ægypti, a primogenito Pharaonis, qui in solio ejus sedebat, usque ad primogenitum captivæ quæ erat in carcere, et omne primogenitum jumentorum.

VULC ³⁰ Surrexitque Pharao nocte, et omnes servi ejus, cunctaque Ægyptus : et ortus est clamor magnus in Ægypto : neque enim erat domus in qua non jaceret mortuus.

VULC ³¹ Vocatisque Pharao Moyse et Aaron nocte, ait : Surgite et egredimini a populo meo, vos et filii Israël : ite, immolate Domino sicut dicitis.

VULC ³² Oves vestras et armenta assumite ut petieratis, et abeuntes benedicite mihi.

VULC ³³ Urgebantque Ægyptii populum de terra exire velociter, dicentes : Omnes moriemur.

VULC ³⁴ Tulit igitur populus conspersam farinam antequam fermentaretur : et ligans in palliis, posuit super humeros suos.

VULC ³⁵ Feceruntque filii Israël sicut præceperat Moyses : et petierunt ab Ægyptiis vasa argentea et aurea, vestemque plurimam.

VULC ³⁶ Dominus autem dedit gratiam populo coram Ægyptiis ut commodarent eis : et spoliaverunt Ægyptios.

VULC ³⁷ Profectique sunt filii Israël de Ramesse in Socoth, sexcenta fere millia peditum virorum, absque parvulis.

VULC ³⁸ Sed et vulgus promiscuum innumerabile ascendit cum eis, oves et armenta et animantia diversi generis multa nimis.

VULC ³⁹ Coxeruntque farinam, quam dudum de Ægypto conspersam tulerant : et fecerunt subcinericios panes azymos : neque enim poterant fermentari, cogentibus exire Ægyptiis, et nullam facere sinentibus moram : nec pulmenti quidquam occurrerat præparare.

VULC ⁴⁰ Habitatio autem filiorum Israël qua manserunt in Ægypto, fuit quadringentorum triginta annorum.

VULC ⁴¹ Quibus expletis, eadem die egressus est omnis exercitus Domini de terra Ægypti.

VULC ⁴² Nox ista est observabilis Domini, quando eduxit eos de terra Ægypti : hanc observare debent omnes filii Israël in generationibus suis.

VULC ⁴³ Dixitque Dominus ad Moysen et Aaron : Hæc est religio Phase : omnis alienigena non comedet ex eo.

VULC ⁴⁴ Omnis autem servus emptitius circumcidetur, et sic comedet.

VULC ⁴⁵ Advena et mercenarius non edent ex eo.

VULC ⁴⁶ In una domo comedetur, nec efferetis de carnibus ejus foras, nec os illius confringetis.

VULC ⁴⁷ Omnis cœtus filiorum Israël faciet illud.

VULC ⁴⁸ Quod si quis peregrinorum in vestram voluerit transire coloniam, et facere Phase Domini, circumcidetur prius omne masculinum ejus, et tunc rite celebrabit : eritque sicut indigena terræ : si quis autem circumcisus non fuerit, non vescetur ex eo.

VULC ⁴⁹ Eadem lex erit indigenæ et colono qui peregrinatur apud vos.

VULC ⁵⁰ Feceruntque omnes filii Israël sicut præceperat Dominus Moysi et Aaron.

VULC ⁵¹ Et eadem die eduxit Dominus filios Israël de terra Ægypti per turmas suas.