VULC ¹ Locutusque est Dominus ad Moysen, dicens :

VULC ² Loquere filiis Israël, ut tollant mihi primitias : ab omni homine qui offeret ultroneus, accipietis eas.

VULC ³ Hæc sunt autem quæ accipere debeatis : aurum, et argentum, et æs,

VULC ⁴ hyacinthum et purpuram, coccumque bis tinctum, et byssum, pilos caprarum,

VULC ⁵ et pelles arietum rubricatas, pellesque janthinas, et ligna setim :

VULC ⁶ oleum ad luminaria concinnanda : aromata in unguentum, et thymiamata boni odoris :

VULC ⁷ lapides onychinos, et gemmas ad ornandum ephod, ac rationale.

VULC ⁸ Facientque mihi sanctuarium, et habitabo in medio eorum :

VULC ⁹ juxta omnem similitudinem tabernaculi quod ostendam tibi, et omnium vasorum in cultum ejus.
Sicque facietis illud :

VULC ¹⁰ arcam de lignis setim compingite, cujus longitudo habeat duos et semis cubitos : latitudo, cubitum et dimidium : altitudo, cubitum similiter ac semissem.

VULC ¹¹ Et deaurabis eam auro mundissimo intus et foris : faciesque supra, coronam auream per circuitum :

VULC ¹² et quatuor circulos aureos, quos pones per quatuor arcæ angulos : duo circuli sint in latere uno, et duo in altero.

VULC ¹³ Facies quoque vectes de lignis setim, et operies eos auro.

VULC ¹⁴ Inducesque per circulos qui sunt in arcæ lateribus, ut portetur in eis :

VULC ¹⁵ qui semper erunt in circulis, nec umquam extrahentur ab eis.

VULC ¹⁶ Ponesque in arca testificationem quam dabo tibi.

VULC ¹⁷ Facies et propitiatorium de auro mundissimo : duos cubitos et dimidium tenebit longitudo ejus, et cubitum ac semissem latitudo.

VULC ¹⁸ Duos quoque cherubim aureos et productiles facies, ex utraque parte oraculi.

VULC ¹⁹ Cherub unus sit in latere uno, et alter in altero.

VULC ²⁰ Utrumque latus propitiatorii tegant expandentes alas, et operientes oraculum, respiciantque se mutuo versis vultibus in propitiatorium quo operienda est arca,

VULC ²¹ in qua pones testimonium quod dabo tibi.

VULC ²² Inde præcipiam, et loquar ad te supra propitiatorium, ac de medio duorum cherubim, qui erunt super arcam testimonii, cuncta quæ mandabo per te filiis Israël.

VULC ²³ Facies et mensam de lignis setim, habentem duos cubitos longitudinis, et in latitudine cubitum, et in altitudine cubitum et semissem.

VULC ²⁴ Et inaurabis eam auro purissimo : faciesque illi labium aureum per circuitum,

VULC ²⁵ et ipsi labio coronam interrasilem altam quatuor digitis : et super illam, alteram coronam aureolam.

VULC ²⁶ Quatuor quoque circulos aureos præparabis, et pones eos in quatuor angulis ejusdem mensæ per singulos pedes.

VULC ²⁷ Subter coronam erunt circuli aurei, ut mittantur vectes per eos, et possit mensa portari.

VULC ²⁸ Ipsos quoque vectes facies de lignis setim, et circumdabis auro ad subvehendam mensam.

VULC ²⁹ Parabis et acetabula, ac phialas, thuribula, et cyathos, in quibus offerenda sunt libamina, ex auro purissimo.

VULC ³⁰ Et pones super mensam panes propositionis in conspectu meo semper.

VULC ³¹ Facies et candelabrum ductile de auro mundissimo, hastile ejus, et calamos, scyphos, et sphærulas, ac lilia ex ipso procedentia.

VULC ³² Sex calami egredientur de lateribus, tres ex uno latere, et tres ex altero.

VULC ³³ Tres scyphi quasi in nucis modum per calamos singulos, sphærulaque simul, et lilium : et tres similiter scyphi instar nucis in calamo altero, sphærulaque simul et lilium. Hoc erit opus sex calamorum, qui producendi sunt de hastili :

VULC ³⁴ in ipso autem candelabro erunt quatuor scyphi in nucis modum, sphærulæque per singulos, et lilia.

VULC ³⁵ Sphærulæ sub duobus calamis per tria loca, qui simul sex fiunt procedentes de hastili uno.

VULC ³⁶ Et sphærulæ igitur et calami ex ipso erunt, universa ductilia de auro purissimo.

VULC ³⁷ Facies et lucernas septem, et pones eas super candelabrum, ut luceant ex adverso.

VULC ³⁸ Emunctoria quoque, et ubi quæ emuncta sunt extinguantur, fiant de auro purissimo.

VULC ³⁹ Omne pondus candelabri cum universis vasis suis habebit talentum auri purissimi.

VULC ⁴⁰ Inspice, et fac secundum exemplar quod tibi in monte monstratum est.