VULC ¹ Igitur congregata omni turba filiorum Israël, dixit ad eos : Hæc sunt quæ jussit Dominus fieri.

VULC ² Sex diebus facietis opus : septimus dies erit vobis sanctus, sabbatum, et requies Domini : qui fecerit opus in eo, occidetur.

VULC ³ Non succendetis ignem in omnibus habitaculis vestris per diem sabbati.

VULC ⁴ Et ait Moyses ad omnem catervam filiorum Israël : Iste est sermo quem præcepit Dominus, dicens :

VULC ⁵ Separate apud vos primitias Domino. Omnis voluntarius et prono animo offerat eas Domino : aurum et argentum, et æs,

VULC ⁶ hyacinthum et purpuram, coccumque bis tinctum, et byssum, pilos caprarum,

VULC ⁷ pellesque arietum rubricatas, et janthinas, ligna setim,

VULC ⁸ et oleum ad luminaria concinnanda, et ut conficiatur unguentum, et thymiama suavissimum,

VULC ⁹ lapides onychinos, et gemmas ad ornatum superhumeralis et rationalis.

VULC ¹⁰ Quisque vestrum sapiens est, veniat, et faciat quod Dominus imperavit :

VULC ¹¹ tabernaculum scilicet, et tectum ejus, atque operimentum, annulos, et tabulata cum vectibus, paxillos, et bases :

VULC ¹² arcam et vectes, propitiatorium, et velum, quod ante illud oppanditur :

VULC ¹³ mensam cum vectibus et vasis, et propositionis panibus :

VULC ¹⁴ candelabrum ad luminaria sustentanda, vasa illius et lucernas, et oleum ad nutrimenta ignium :

VULC ¹⁵ altare thymiamatis, et vectes, et oleum unctionis et thymiama ex aromatibus : tentorium ad ostium tabernaculi :

VULC ¹⁶ altare holocausti, et craticulam ejus æneam cum vectibus et vasis suis : labrum et basim ejus :

VULC ¹⁷ cortinas atrii cum columnis et basibus, tentorium in foribus vestibuli,

VULC ¹⁸ paxillos tabernaculi et atrii cum funiculis suis :

VULC ¹⁹ vestimenta, quorum usus est in ministerio sanctuarii, vestes Aaron pontificis ac filiorum ejus, ut sacerdotio fungantur mihi.

VULC ²⁰ Egressaque omnis multitudo filiorum Israël de conspectu Moysi,

VULC ²¹ obtulerunt mente promptissima atque devota primitias Domino, ad faciendum opus tabernaculi testimonii. Quidquid ad cultum et ad vestes sanctas necessarium erat,

VULC ²² viri cum mulieribus præbuerunt, armillas et inaures, annulos et dextralia : omne vas aureum in donaria Domini separatum est.

VULC ²³ Si quis habebat hyacinthum, et purpuram, coccumque bis tinctum, byssum et pilos caprarum, pelles arietum rubricatas, et janthinas,

VULC ²⁴ argenti, ærisque metalla, obtulerunt Domino, lignaque setim in varios usus.

VULC ²⁵ Sed et mulieres doctæ, quæ neverant, dederunt hyacinthum, purpuram, et vermiculum, ac byssum,

VULC ²⁶ et pilos caprarum, sponte propria cuncta tribuentes.

VULC ²⁷ Principes vero obtulerunt lapides onychinos, et gemmas ad superhumerale et rationale,

VULC ²⁸ aromataque et oleum ad luminaria concinnanda, et ad præparandum unguentum, ac thymiama odoris suavissimi componendum.

VULC ²⁹ Omnes viri et mulieres mente devota obtulerunt donaria, ut fierent opera, quæ jusserat Dominus per manum Moysi. Cuncti filii Israël voluntaria Domino dedicaverunt.

VULC ³⁰ Dixitque Moyses ad filios Israël : Ecce, vocavit Dominus ex nomine Beseleel filium Uri, filii Hur de tribu Juda,

VULC ³¹ implevitque eum spiritu Dei, sapientia et intelligentia, et scientia et omni doctrina,

VULC ³² ad excogitandum, et faciendum opus in auro, et argento, et ære,

VULC ³³ sculpendisque lapidibus, et opere carpentario, quidquid fabre adinveniri potest,

VULC ³⁴ dedit in corde ejus : Ooliab quoque filium Achisamech de tribu Dan :

VULC ³⁵ ambos erudivit sapientia, ut faciant opera abietarii, polymitarii, ac plumarii, de hyacintho ac purpura, coccoque bis tincto, et bysso, et texant omnia, ac nova quæque reperiant.